Azpeitiko Saninazioak

Jai-giro bikaina, zezenketak eta ekitaldi erlijiosoak dira Azpeitiko San Inazio jaien ("Saninazioak") protagonista nagusiak. Uztailaren 30ean ematen diete hasiera Saninazioei, baina, hilaren 31an, San Inazio egunean, egiten dituzte ospakizun gehienak. Egun horretan meza nagusia eskaintzen dute Soreasuko Sebastian Deunaren elizan eta, aurretik, prozesioa egiten dute herriko alde zaharreko kaleetan zehar. Ospakizun horiek Loiolako santutegian errepikatzen dituzte abuztuaren 1ean. Gainera, aurtengoan, Arrupe, nire isiltasuna ikuskizuna hartuko du Loiolak San Inazio egunean. Gontzal Mendibilek zuzendari lanak egingo ditu eta 400 lagun inguru izango dira eszenatoki gainean: Ludvig Orkestra Sinfonikoko kideak, Donostiako Orfeoia, Gaudeamus abesbatzako (Gernika-Lumo) kideak, ehun bat aktore eta figurante, Marife Nogales mezzo-sopranoa eta Igor Yebra dantzari bilbotarra.

Bestalde, gaur egungo toreatzaile ezagunenetako batzuk izango dira Azpeitin, uztailaren 31tik abuztuaren 2ra bitartean. Besteak beste, Manuel Jesus "El Cid"ek, Alejandro Talavantek, Pepin Liriak, Javier Valverdek eta Jose Maria Manzaneresek euren abilezia erakutsiko dute zezen-plazan.